Sajak Sunda | RAMPÉ ASTANA

RAMPÉ ASTANA
Karya: Rizal Sabda, S.Pd.

“sapadalisan deui!” omong jukut basa simpé
ngamangsa sukma salira
runggunuk kembang usik-usikan
ngusak-ngusik hujung implengan langit
nu luhur, nu pangluhur-luhurna
patempatan dang hyang murba wisésa
di lebah dinya gurat ngancikna

Tapi hanjakal di dinya bulan teu kaanjangan
ukur semet kikisikna
ogé béntangna di dinya teu kaéndongan
ukur semet sésémpérna

(kitu gé mun pareng sukma
keur ngagali buana atawa ngagali jagat
sok katémbong gambar langit hirup)

bréh katémbong cai walungan ririakan sawah saamparan
batu harideung daun kalapa juringkangna
ngajulan gumplukan méga

tah, basa angin reureundahan nepak lamping cupu gunung
aya nu ngaréntang: kawas anjeun
kawas anjeun basa ningker kalangkang heulang?!

“gancang balikan deui, bising implengan dipaut ku jin!”
omong mumunggang nu dikelir yutaan akar;
teu lila: angin ngahiung sedeng salira beuki luhur
beuki hiber ka langit suwung. Tah, di dinya, basa anjeun ngapung
ka luhur kuwung-kuwung, warna-warni katumbiri
lalaunan nurunkeun cluk-clak ci hujan
;rata nyiraman tutuwuhan!

(Patandang-patandang ti Kabupaten Tasikmalaya dina acara Pasanggiri Sastra,dan Seni Daerah 2010)

( Patandang ti kab. Tasikmalaya dina widang sajak:) Syifa maca sajak Rampe Astana , Hilmi maca sajak Jalu)